मुंबई : प्रतिनिधी
आगामी शैक्षणिक वर्षातील सुट्ट्यांचे वेळापत्रक शिक्षण विभागाने जाहीर केले. त्यानुसार दोन मेपासून शाळांना उन्हाळी सुटी असून, १५ जूनला नवीन शैक्षणिक वर्षाला सुरवात होईल. सध्या निवडणुकीच्या कामात व्यस्त असलेल्या शिक्षकांना पुढच्या सत्रात तब्बल १२८ दिवस हक्काच्या सुट्या मिळणार आहेत.
यात दिवाळीच्या सुट्या २८ ऑक्टोबर ते १४ नोव्हेंबरदरम्यान असतील. १५ नोव्हेंबरला गुरुनानक जयंतीमुळे सुटी असेल.त्यानंतर १६ नोव्हेंबरपासून दिवाळीनंतर शाळा सुरू होणार आहे. शिवाय शासनाने निर्धारित केलेल्या २० सुट्टया, विभागीय आयुक्त, जिल्हाधिकाऱ्यांच्या अधिकारातील ३ आणि मुख्याध्यापक स्तरावरील २ सुट्याही असतील. ज्या शाळांना गणेशोत्सव, नाताळ, रमजान, मोहरम सारख्या सणांना सुट्या घ्यायच्या असतील, त्यांनी दिवाळीची सुटी कमी करून त्याऐवजी इतर सणांच्या तेवढ्याच कालावधीची सुट्टी समायोजनाने शालेय व्यवस्थापन समितीच्या मान्यतेने जाहीर करावी. नागपंचमी, पोळा, राजमाता जिजाऊ जयंती आदीप्रसंगी स्थानिक मागणीप्रमाणे शाळा व्यवस्थापन समितीच्या मान्यतेने मुख्याध्यापक अधिकारातील सुटी जाहीर करण्याचा निर्णय घ्यावा, असेही आदेशात नमूद आहे. शिक्षकांना तब्बल ७६ सुट्टया मिळणार आहेत. त्यात २० सार्वजनिक सुट्ट्या, १० दिवस दिवाळी सुट्टया, जिल्हाधिकाऱ्यांच्या अधिकारातील ३ सुट्टया, ४० दिवसांच्या उन्हाळी सुट्या व मुख्याध्यापकांच्या अधिकारातील ३ सुट्ट्यांचा समावेश आहे. याशिवाय या सत्रात रविवारच्या ५२ सुट्टया मिळणार आहेत. अशा एकंदर १२८ दिवस सुट्टया मिळणार आहेत.
