रत्नागिरी : प्रतिनिधी
रत्नागिरी शहरात प्रतिबंधित गुटखा व पान मसाल्याच्या अवैध साठा व विक्रीवर पोलिसांनी पहाटेच्या सुमारास मोठी आणि नियोजनबद्ध धडक कारवाई करत कोल्हापुरातील एकाला अटक केली आहे. या कारवाईत तब्बल ६,७७,९०४ रुपयांचा मुद्देमाल जप्त करण्यात आला आहे.
कोल्हापूर येथून एक व्यक्ती मोठ्या प्रमाणात प्रतिबंधित गुटखा व पान मसाला रत्नागिरीत विक्रीसाठी आणणार असल्याची खात्रीशीर गोपनीय माहिती पोलिसांना मिळाली होती. या माहितीच्या आधारे वरिष्ठ अधिकाऱ्यांना अवगत करून त्यांच्या मार्गदर्शनाखाली तात्काळ विशेष पथकाची स्थापना करण्यात आली.
पोलीस निरीक्षक विवेक पाटील यांच्या नेतृत्वाखालील पथकाने अत्यंत शिताफीने सापळा रचत पहाटेच संशयित वाहनाला अडवून तपासणी केली. यावेळी शरद गणपती भंडारे (रा. सरुड, ता. शाहुवाडी, जि. कोल्हापूर) याच्या ताब्यातून मोठ्या प्रमाणात प्रतिबंधित गुटखा व पान मसाला आढळून आला.
या कारवाईत ३,२७,९०४ रुपयांचा प्रतिबंधित मुद्देमाल तसेच वाहतुकीसाठी वापरण्यात आलेली अंदाजे ३,५०,००० रुपयांची इको कार जप्त करण्यात आली. एकूण ६,७७,९०४ रुपयांचा मुद्देमाल पोलिसांनी ताब्यात घेतला आहे.सदर प्रकरणी रत्नागिरी शहर पोलीस ठाण्यात आरोपीविरुद्ध गुन्हा दाखल करण्यात आला असून पुढील तपास पोलीस उपनिरीक्षक सागर शिंदे यांच्या मार्गदर्शनाखाली सुरू आहे.
