रत्नागिरी : प्रतिनिधी
महाराष्ट्र विधान परिषद निवडणुकीसाठी भाजपने जाहीर केलेल्या उमेदवारांच्या यादीत सिंधुदुर्ग जिल्ह्यातील भाजपचे प्रभावी नेते प्रमोद जठार यांना संधी देण्यात आली आहे. कोकणातील भाजप संघटना उभारण्यात मोलाची भूमिका बजावणाऱ्या जठार यांच्या उमेदवारीमुळे सिंधुदुर्गसह संपूर्ण कोकणात उत्साहाचे वातावरण निर्माण झाले आहे. प्रमोद जठार हे कोकणातील भाजपचे जुने आणि निष्ठावंत कार्यकर्ते म्हणून ओळखले जातात. जिल्हा परिषद, स्थानिक स्वराज्य संस्था तसेच संघटनात्मक पातळीवर त्यांनी सातत्याने काम केले आहे. कार्यकर्त्यांशी जवळीक, आक्रमक शैली आणि पक्षनिष्ठा यामुळे ते कोकणात लोकप्रिय चेहरा मानले जातात.
भाजपने संघटनात्मक काम करणाऱ्या आणि दीर्घकाळ पक्षनिष्ठा जपलेल्या नेत्यांना प्राधान्य दिल्याचे या यादीतून स्पष्ट झाले आहे.
- प्रमोद जठार (सिंधुदुर्ग) – कोकणातील प्रभावी नेतृत्व म्हणून ओळख.
- विवेक कोल्हे (अहिल्यानगर) – कोपरगावच्या कोल्हे घराण्याचे युवा नेतृत्व.
- संजय भेंडे (नागपूर) – भाजपचे प्रदेश उपाध्यक्ष व संघटनात सक्रिय चेहरा.
- माधवी नाईक – पक्ष संघटनात सातत्याने कार्यरत नेत्या.
- सुनील कर्जतकर – दीर्घकाळ पक्षासाठी काम करणाऱ्या निष्ठावंत नेत्यांना संधी.
विशेषतः सिंधुदुर्ग आणि मालवण-देवगड पट्ट्यात भाजपची ताकद वाढवण्यासाठी त्यांनी मोठे प्रयत्न केले. ग्रामीण भागात पक्षाचा विस्तार, बूथ स्तरावरील रचना मजबूत करणे आणि स्थानिक प्रश्नांवर सातत्याने आवाज उठवणे यामुळे त्यांची स्वतंत्र ओळख निर्माण झाली. भाजपने प्रमोद जठार यांना उमेदवारी देऊन कोकणातील कार्यकर्त्यांना मोठा संदेश दिला आहे. कोकणावर अन्याय होत असल्याची भावना काही काळ व्यक्त होत होती. अशा परिस्थितीत स्थानिक आणि निष्ठावंत नेतृत्वाला संधी देत पक्षाने नाराजी दूर करण्याचा प्रयत्न केल्याचे बोलले जात आहे.
प्रमोद जठार यांची प्रतिमा अभ्यासू, संघटनप्रिय आणि लढाऊ नेते अशी आहे. मतदारसंघातील विकासकामे, रोजगार, पर्यटन, मत्स्यव्यवसाय, रस्ते आणि स्थानिक प्रश्नांवर त्यांनी सातत्याने भूमिका घेतली आहे. त्यामुळे विधान परिषदेत कोकणाचा बुलंद आवाज म्हणून त्यांच्याकडे पाहिले जात आहे.त्यांच्या उमेदवारीनंतर सिंधुदुर्ग जिल्ह्यात भाजप कार्यकर्त्यांमध्ये जल्लोषाचे वातावरण आहे. आगामी काळात कोकणातील भाजपचे राजकारण अधिक बळकट करण्यासाठी प्रमोद जठार यांची निवड महत्त्वाची मानली जात आहे.
