रत्नागिरी : प्रतिनिधी
रत्नागिरी नगरपालिकेत भ्रष्टाचाराचा आणि अनागोंदी कारभाराचा एक धक्कादायक प्रकार उघडकीस आला आहे. शहरातील भटक्या कुत्र्यांसाठी उभारण्यात येणाऱ्या ५० लाख रुपयांच्या ‘डॉग शेल्टर’चे काम कोणत्याही प्रशासकीय मंजुरीशिवाय ७० टक्के पूर्ण झाले आहे. हा प्रकार समोर येताच शिवसेना उबाठाचे नगरसेवक केतन शेट्ये यांनी आक्रमक पवित्रा घेत एका ‘अज्ञात’ ठेकेदाराचा हा मोठा आर्थिक डाव उधळून लावला आहे. त्यामुळे हा प्रकार पाहून कोणाच्या खांद्यावर ठेक्याचे ओझे ही नवीन म्हण प्रचलित होणार आहे.
मिळालेल्या माहितीनुसार, रत्नागिरी नगरपालिकेकडून डॉग शेल्टर उभारण्याचे नियोजित होते. मात्र, या कामासाठी लागणारी अधिकृत निविदा प्रक्रिया (Tendering), तांत्रिक मंजुरी किंवा कार्यादेश (Work Order) अद्याप पूर्ण झालेली नाही. असे असतानाही, एका खाजगी ठेकेदाराने पालिकेच्या जागेत हे काम सुरु केले आणि पाहता पाहता ७० टक्क्यांहून अधिक बांधकाम पूर्ण केले. धक्कादायक बाब म्हणजे, पालिकेच्या वरिष्ठ अधिकाऱ्यांच्या डोळ्यांदेखत हे काम सुरू असताना त्याकडे सोयीस्कर दुर्लक्ष करण्यात आल्याचा आरोप होत आहे.
शिवसेना उबाठाचे नगरसेवक केतन शेट्ये यांनी या प्रकरणाची कागदपत्रे तपासली असता, या ५० लाखांच्या कामाची कोणतीही नोंद पालिकेच्या दप्तरी नसल्याचे समोर आले. “कोणत्याही मंजुरीशिवाय इतके मोठे काम झालेच कसे? आणि जर हे काम अधिकृत नाही, तर यावर होणारा खर्च कोणाच्या खिशातून जात आहे?” असे सवाल शेट्ये यांनी उपस्थित केले आहेत. या प्रकरणामागे कोणाचे वरदहस्त आहेत, याची चर्चा आता रत्नागिरीत रंगली आहे.
विनापरवाना सुरू असलेल्या या कामामुळे पालिकेचे नियम आणि पारदर्शकता धाब्यावर बसवली गेल्याचे स्पष्ट होत आहे. या गंभीर प्रकरणाची सखोल चौकशी करून संबंधित दोषी अधिकारी आणि ठेकेदारावर कडक कारवाई करण्याची मागणी नागरिकांमधून केली जात आहे. आता यावर नगरपालिका प्रशासन नेमकी काय भूमिका घेते, याकडे सर्वांचे लक्ष लागले आहे.
