दापोली : प्रतिनिधी
जमिनीच्या ७/१२ उताऱ्यावर फेरफार नोंद करण्यासाठी १० हजार रुपयांची लाच स्वीकारणाऱ्या एका महिला ग्राम महसूल अधिकाऱ्याला (तलाठी) लाचलुचपत प्रतिबंधक विभागाने (ACB) रंगेहात पकडले आहे. बुधवारी (२५ फेब्रुवारी २०२६) दापोली येथील तहसीलदार कार्यालयातच ही कारवाई करण्यात आली असून, यामुळे महसूल विभागात मोठी खळबळ उडाली आहे.श्रद्धा बालाजी बंडे (वय ३०) असे अटक करण्यात आलेल्या महिला अधिकाऱ्याचे नाव असून, त्या नानटे येथे ग्राम महसूल अधिकारी म्हणून कार्यरत आहेत.
मिळालेल्या माहितीनुसार, तक्रारदार आणि त्यांच्या मित्राने मौजे तेरेवायंगणी येथे भागीदारीत एक जमीन खरेदी केली होती. या जमिनीच्या सातबारा उताऱ्यावर फेरफार नोंद करून त्याची प्रत मिळवण्यासाठी तक्रारदाराने तलाठी कार्यालयात अर्ज केला होता. हे शासकीय काम करण्यासाठी तलाठी श्रद्धा बंडे यांनी तक्रारदाराकडे १०,००० रुपयांच्या लाचेची मागणी केली. मात्र, लाच देण्याची इच्छा नसल्याने तक्रारदाराने थेट रत्नागिरी लाचलुचपत प्रतिबंधक विभागाकडे धाव घेत तक्रार दाखल केली.
एसीबीच्या अधिकाऱ्यांनी तक्रारीची पडताळणी केली असता, लाचेची मागणी झाल्याचे स्पष्ट झाले. त्यानंतर पथकाने दापोली तहसीलदार कार्यालयाच्या परिसरात सापळा रचला. बुधवारी ठरल्याप्रमाणे तक्रारदाराकडून १० हजार रुपये स्वीकारताना श्रद्धा बंडे यांना पंचांसमक्ष रंगेहात पकडण्यात आले. ही कारवाई पोलीस अधीक्षक शिवराज पाटील, अपर पोलीस अधीक्षक भागवत सोनावणे यांच्या मार्गदर्शनाखाली पोलीस उपअधीक्षक अविनाश पाटील, पोलीस निरीक्षक मच्छिंद्र जाधव आणि सुहास रोकडे यांच्या पथकाने यशस्वीपणे पार पाडली. सध्या याप्रकरणी गुन्हा दाखल करण्याची प्रक्रिया सुरू असून, या कारवाईमुळे भ्रष्ट अधिकारी आणि कर्मचाऱ्यांचे धाबे दणाणले आहेत.
