रत्नागिरी : प्रतिनिधी
रत्नागिरी जिल्ह्यात भ्रष्टाचाराविरुद्ध लाचलुचपत प्रतिबंधक विभागाने (ACB) मोठी कारवाई केली असून, सावर्डे पोलीस ठाण्याचे पोलीस उपनिरीक्षक (PSI) मनीष कांबळे यांना लाच प्रकरणात अडकल्याने पोलीस दलात मोठी खळबळ उडाली आहे. विमा दाव्याच्या कागदपत्रांसाठी १५ हजार रुपयांची लाच घेताना ही कारवाई करण्यात आली.
एका तक्रारदाराला विमा दाव्यासाठी (Insurance Claim) काही आवश्यक कागदपत्रांची गरज होती. ही कागदपत्रे देण्यासाठी मनीष कांबळे यांनी सुरुवातीला २५ हजार रुपयांची मागणी केली होती. मात्र, तडजोडीनंतर ही रक्कम १५ हजार रुपयांवर निश्चित करण्यात आला.तक्रारदाराने एसीबीकडे धाव घेत तक्रार नोंदवल्यानंतर, चिपळूण येथे सापळा रचण्यात आला. कारवाई टाळण्यासाठी कांबळे यांनी हुशारी दाखवत स्वतः पैसे न स्वीकारता एका खाजगी व्यक्तीला पानटपरीवर पैसे स्वीकारण्यास सांगितले.तक्रारदाराने १५ हजार रुपये देताच एसीबीच्या पथकाने त्या खाजगी व्यक्तीला ताब्यात घेतले. पकडलेल्या व्यक्तीने ही रक्कम PSI कांबळे यांच्या सांगण्यावरूनच घेतल्याची कबुली दिली, ज्यामुळे कांबळे यांचा थेट सहभाग निष्पन्न झाला.या प्रकरणी भ्रष्टाचार प्रतिबंधक कायद्याच्या विविध कलमान्वये गुन्हा दाखल करण्यात आला असून, पुढील तपास वेगाने सुरू आहे. रक्षकच जेव्हा भक्षक बनतात, तेव्हा जनतेचा विश्वास डळमळीत होतो. या घटनेमुळे जिल्ह्यात पोलीस दलाच्या प्रतिमेला मोठा धक्का बसला असून सर्वसामान्य नागरिकांमधून तीव्र संताप व्यक्त होत आहे.
