रत्नागिरी : प्रतिनिधी
शहरानजीकच्या खेडशी नाका येथे राहणाऱ्या श्रीमती विमल शंकर पेडणेकर (वय ८५) यांनी मृत्यूनंतरही इतरांसाठी जीवनाचा दीप प्रज्वलित करत शासकीय वैद्यकीय महाविद्यालय, रत्नागिरी येथे आपला देह अर्पण केला. दिनांक २५ जून २०२५ रोजी वृद्धापकाळाने त्यांचे शासकीय रुग्णालय, रत्नागिरी येथील अतिदक्षता विभागात सायंकाळी निधन झाले. त्यांच्या मृत्यूनंतर त्यांच्या कन्या श्रीमती माधवी मधुकर नाखरेकर यांनी उदार मनाने आणि प्रेरणादायी विचारांनी देहदानाचा निर्णय घेतला.“आईच्या देहाचा उपयोग वैद्यकीय शिक्षणासाठी व संशोधनासाठी व्हावा हीच इच्छा,” असे त्यांनी सांगितले.
यावेळी श्रीम. पेडणेकर यांची नात सौ. मंजिरी नाखरेकर, नातजावई सुहास पालेकर, तसेच सागर भिंगारे, आणि शासकीय रुग्णालयाचा स्टाफ यांचे मोलाचे सहकार्य लाभले. श्रीमती विमल पेडणेकर यांचे हे रत्नागिरी वैद्यकीय महाविद्यालयातील सातवे मरणोत्तर देहदान ठरले आहे.
ही संपूर्ण प्रक्रिया महाविद्यालयाचे अधिष्ठाता डॉ. जयप्रकाश रामानंद यांच्या मार्गदर्शनाखाली पार पडली. वैद्यकीय अधीक्षक डॉ. विनोद सांगवीकर, शरीररचनाशास्त्र विभागप्रमुख डॉ. सादिकअली सय्यद, डॉ. योगिता कांबळे, वैद्यकीय समाजसेवा अधीक्षक रेशम जाधव, तसेच विभागीय कर्मचारी पूर्वा तोडणकर, भूमी पारकर, मिथिलेश मुरकर, मिहिर लोंढे यांनी हे कार्य कौशल्याने पूर्ण केले. देहदानासारख्या उदात्त कार्यामुळे विमल पेडणेकर यांचे नाव विद्यार्थ्यांच्या ज्ञानप्राप्तीमध्ये अजरामर राहील.
