रत्नागिरी : प्रतिनिधी
रत्नागिरी जिल्ह्यातील मुंबई – गोवा राष्ट्रीय महामार्गाची दुर्दशा झाली आहे. रत्नागिरी, संगमेश्वर व लांजा या भागातून जाणाऱ्या रस्त्यांवर मोठ्या प्रमाणात चिखलाचे साम्राज्य पसरले आहे. या चिखलामुळे अनेक ठिकाणी अपघात होण्याचे प्रमाण वाढले आहे. वाहन चालवताना वाहन चालकांना तारेवरची कसरत करावी लागत आहे. गत रविवारी बावनदी येथील तीव्र उतारावर शिक्षकांच्या खासगी बसला गॅस वाहू टँकरने धडक देऊन अपघात झाला होता. येथे ठेकेदाराने रस्त्याची दुर्दशा करून ठेवल्याने हा अपघात घडल्याची प्रतिक्रिया उमटत आहे. असे वारंवार छोटे मोठे अपघात होत असतात. त्यामुळे महामार्गाचे काम अर्धवट ठेवणाऱ्या आणि रस्त्यावर चिखल होईल असे काम करणाऱ्या ठेकेदाराबद्दल नाराजीचे वातावरण आहे.
आरवली येथील गडनदीवरील पूल आणि संगमेश्वर येथील सोनवी नदीवरील पुलाचे काम अपूर्ण अवस्थेत आहे. त्याचबरोबर संगमेश्वरपासून सुमारे १७ किलोमीटर अंतरावर सप्तशृंगी नदी आणि २० किलोमीटर अंतरावरील बावनदी येथील पुलांचेही काम अपूर्ण अवस्थेत आहे. निवळी घाटातील कामही बऱ्याच प्रमाणात शिल्लक आहे. तेथून पुढे लांजापर्यंतचे काम वेगाने पूर्ण होण्याची चिन्हे आहेत. पण प्रत्यक्ष लांजा बाजारपेठेतील उड्डाणपूल रखडला आहे. चिपळूणजवळ परशुराम घाटातील धोकादायक आणि आव्हानात्मक कामही पावसाळ्यानंतर झपाट्याने पूर्ण होत आले असून घाटातील दोन्ही मार्गिका लवकरच पूर्ण होतील, अशी अपेक्षा आहे. पण चिपळूण येथील बहादूर शेख नाक्याजवळ उड्डाण पुलाच्या बांधकामाचे गर्डर गेल्या ऑक्टोबर महिन्यात झालेल्या अपघातामुळे या टापूतील कामाचे वेळापत्रक कोलमडले आहे. संपूर्ण महामार्ग पूर्ण होण्यासाठी अजून वर्षभर कालावधी लागण्याची शक्यता आहे. त्यात महामार्गावर काम करणारे ठेकेदार सुस्तावले आल्याचे चित्र आहे.
रत्नागिरी जिल्ह्यातून जाणारा मुंबई गोवा महामार्गाचे गेले १८वर्ष काम सुरु आहे. तरी हा महामार्ग पुर्ण होवू शकला नाही. संपुर्ण देशात हा महामार्ग आता चर्चेचा विषय बनला आहे. पावसाला सुरु झाल्याने आता या महामार्गाचे काम मंदावले आहे. मात्र संगमेश्वर, रत्नागिरी व लांजा या ठिकाणी करण्यात आलेल्या कामांमुळे रस्त्याची भयानक अवस्था झाली आहे. पावसाच्या पाण्याने रस्त्यावरच चिखल आल्याने वाहन चालकांना तारेवरची कसरत करावी लागत आहे. तसेच या चिखलामुळे अपघात होण्याचे प्रमाण देखील वाढले आहे. ठेकेदार कशापद्धतीने चुकीचे काम करत आहे त्याची चर्चा येथे आहे.
