रत्नागिरी : प्रतिनिधी
कोणतीही पूर्व परवानगी न घेता तसेच रत्नागिरी जिल्हा परिषदेचे तत्कालीन मुख्य कार्यकारी अधिकारी कीर्तीकिरण पुजार यांच्या नावाचा गैरवापर करून मिशन आपुलकी योजने अंतर्गत शाळेच्या मदतीसाठी लकी ड्रॉ कूपन छापणाऱ्या प्रवीण रावसाहेब किणे या पदवीधर शिक्षकाविरोधात ग्रामीण पोलिस ठाण्यात गुन्हा दाखल करण्यात आला आहे. आधीच चोर त्यात ही अशी कमाई करण्याची लूटमारी प्रवृत्ती यामुळे संपूर्ण शिक्षक शब्दाला काळिमा फासला जात आहे.
प्रवीण रावसाहेब किणे याच्याविरोधात प्राथमिक जिल्हा परिषद रत्नागिरीचे शिक्षणाधिकारी भिकाजी मारुती कासार (५४ सध्या रा. सावली बंगलो, नाचणे, रत्नागिरी) यांनी शुक्रवार १८ एप्रिल रोजी ग्रामीण पोलिस ठाण्यात तक्रार दिली. त्यानुसार, संशयित आरोपी प्रवीण किणे हा ५ डिसेंबर २०२२ ते २४ ऑक्टोबर २०२४ या कालावधीत कशेळी जिल्हा परिषद प्राथमिक शाळा नं.१ येथे पदवीधर शिक्षक म्हणून होता. या कालावधीत त्याने जिल्हा परिषद पूर्ण प्राथमिक आदर्श शाळा कशेळी नंबर १ या नावाने लकी ड्रॉ कुपन छापले. त्या कुपनवर गुणवत्ता पूर्ण शाळा शैक्षणिक कमिटी व शाळा व्यवस्थापन कमिटी यांच्या सहयोगाने तत्कालीन मुख्य कार्यकारी अधिकारी कीर्तीकिरण पुजार यांच्या प्रेरणेने मिशन आपुलकी योजनेअंतर्गत शाळेच्या मदतीसाठी लकी ड्रॉ असा मजकूर छापला. त्यावर पहिले बक्षिस एल.ई.डी. टीव्ही, दुसरे बक्षिस घड्याळ, तिसरे बक्षीस टी शर्ट, चौथे बक्षिस किचन, बंपर बक्षीस फ्रिज असा मजकुर लिहिला. हे कुपन आरोपी प्रवीण किणे याने शासनाची कोणतीही पूर्व परवानगी न घेता, तसेच जिल्हा परिषद रत्नागिरीचे मुख्य कार्यकारी अधिकारी कीर्तीकिरण पुजार यांच्या नावाचा गैरवापर करुन त्यांच्या लौकिकास तसेच जिल्हा परिषद रत्नागिरीचे लौकिकास बाधा आणून शासनाची फसवणूक करण्याचे उद्देशाने बनावटीकरण करून, अनाधिकाराने छापले होते. या प्रकरणी प्रवीण किणे या शिक्षकाविरोधात गुन्हा करण्यात आला आहे. अशी प्रवृत्ती आणि कर्म असेल तर शिक्षक निलंबित होणार नाही तर काय होणार?
