रत्नागिरी : प्रतिनिधी
महाविद्यालयीन विद्यार्थ्यांनी आपले शारीरिक, मानसिक आरोग्याच्या संदर्भात जागरुक असले पाहिजे. आधुनिक तंत्र साधनांचा वापर करताना आपल्या आपल्या डोळ्यांची काळजीही जाणीवपूर्वक घेतली पाहिजे. डोळ्यांचे आरोग्य हा अनेकवेळा दुर्लक्षित विषय असतो मात्र सहजपणे लाभलेले हे डोळे आपल्यासाठी महत्वपूर्ण असून त्याची काळजीही तितकीच महत्वाची आहे. या शब्दात महाविद्यालयाचे प्राचार्य डॉ. मकरंद साखळकर यांनी मार्गदर्शन केले. ते गोगटे – जोगळेकर महाविद्यालयात नुकत्याच आयोजित करण्यात आलेल्या मोफत आरोग्य तपासणी शिबिरात बोलत होते.
विद्यार्थी, कर्मचारी यांचेसाठी आरोग्य विषयक उपक्रमांचे आयोजन महाविद्यालयात नेहमीच केले जात असते. कर्मचारी कल्याण समिती, राष्ट्रीय सेवा योजना विभाग, वरिष्ठ व कनिष्ठ महाविद्यालय यांचे माध्यमातून सर्वांसाठी मोफत नेत्र तपासणी शिबिराचे आयोजन करण्यात आले होते. यावेळी कर्मचारी कल्याण विभागाचे समन्वयक डॉ. आनंद आंबेकर यांनी कर्मचारी कल्याण समिती आणि विद्यार्थी मंडळ यांचे माध्यमातून वर्षभर होणाऱ्या कर्मचारी व विद्यार्थी हितैषी उपक्रमची माहिती दिली. श्री. विशाल सोनकर यांनी डोळ्यांचे संबंधित आरोग्य, चष्मा व नेत्र तपासणी संदर्भात थोडक्यात माहिती दिली. याप्रसंगी प्राध्यापक, कर्मचारी तसेच विद्यार्थी उपस्थित होते. प्र.प्राचार्य पी. पी. कुलकर्णी, कलाशाखा उपप्राचार्या चित्रा गोस्वामी, वाणिज्य शाखा उपप्राचार्या डॉ. सीमा कदम, विज्ञान शाखा उपप्राचार्या डॉ. अपर्णा कुलकर्णी यांनी शिबीर संयोजनात सहभाग घेतला. प्रा. सचिन सनगरे, श्री. मंगेश पावसकर, श्री. शांताराम बावदाने, अपेक्षा घाडी, साहिल पिर्खान यांनी या नेत्र तपासणी शिबिराचे व्यवस्थापन केले. १६४ कर्मचारी व विद्यार्थांनी आपली नेत्र तपासणी करून घेतली.
