दोन सुवर्णपदके मिळवून राज्यस्तरीय स्पर्धेसाठी निवड
रत्नागिरी : प्रतिनिधी
रत्नागिरीमधील एसआरके तायक्वांदो क्लबची खेळाडू स्वरा साखळकर हिने याबाविसवी सिनियर महिला व पुरुष ज्युनिअर आणि सबज्युनिअर ७ वी कॅडेट मुले व मुली रत्नागिरी जिल्हा अजिंक्यपद क्युरोगी व पुमसे तायक्वांदो चॅम्पियनशिप स्पर्धेत दोन सुवर्णपदके मिळवली. फ्री स्टाईल पुमसे प्रकारात १ सुवर्ण पदक तर क्युरोगीमध्ये कॅडेट गटात एक सुवर्णपदक मिळविले. तिने मिळवलेल्या या यशामुळे तालुका भद्रावती जिल्हा चंद्रपूर येथे होणाऱ्या राज्यस्तरीय अजिंक्यपद तायक्वांदो स्पर्धेसाठी तिची निवड झाली आहे.
बाविसवी सिनियर महिला व पुरुष ज्युनिअर आणि सबज्युनिअर ७ वी कॅडेट मुले व मुली रत्नागिरी जिल्हा अजिंक्यपद क्युरोगी व पुमसे तायक्वांदो चॅम्पियनशिप २०२४-२५ रत्नागिरी तायक्वांदो स्पोर्ट्स असोसिएशन यांच्या संयुक्त विद्यमाने नुकत्याच डॉ. बाबासाहेब आंबेडकर भवन राजापूर येथे तायक्वांदो स्पर्धा मोठ्या उत्साहात पार पडली. या स्पर्धेला ६०० खेळाडूंनी सहभाग नोंदविला होता. त्यामध्ये रत्नागिरीतील मधील ६० खेळाडूंनी सहभाग घेतला होता. स्वरा ही या स्पर्धेत सहभागी झाली होती.
राजापूर येथील स्पर्धेसाठी स्वरा हिला क्लबचे मुख्य प्रशिक्षक शाहरुख यांचे मोलाचे मार्गदर्शन लाभले. स्वरा ही दामले शाळेची विद्यार्थिनी असून इयत्ता सहावीमध्ये शिकत आहे. तिने मिळवलेल्या या यशाबद्दल सर्व स्तरातून तिथे कौतुक होत आहे.
