संगमेश्वर : प्रतिनिधी
मुंबई – गोवा महामार्गावरील धामणी पिकअप शेड ते संगमेश्वर दरम्यान पडलेले भलेमोठे खड्डे वाहतुकीसाठी धोकादायक ठरू लागले आहेत तरीही या मार्गावरील खड्डे बुजवून रस्ता अपघातविरहीत करण्यासाठी संबंधित विभागाने लक्ष देणे गरजेचे आहे. अन्यथा होणाऱ्या परिणामांची पूर्णपणे जबाबदारी संबंधित राष्ट्रीय महामार्ग विभागाने स्वीकारावी, असा इशारा सामाजिक कार्यकर्ते सचिन यादव यांनी दिला आहे.
सचिन यादव म्हणाले की, या मार्गावरुन शाळा, कॉलेज, नोकरी, तसेच दवाखान्यात जायचा तसेच सर्व शासकीय कार्यालये सुध्दा याच मार्गाने जावे लागते आहे. त्यामुळे या सर्व गोष्टींचा विचार करून संबंधित विभागाने वेळीच उपाययोजना करणे गरजेचे आहे. पावसामुळे खड्ड्यांचा वाहनचालकांसह पादचाऱ्यांना अजिबात अंदाज येत नाही त्यामुळे हा रस्ता वाहतुकीसाठी धोक्याचा झाला आहे. आता कुठे पाऊस पडण्यास सुरुवात झाली आहे अजून पूर्ण पावसाचा हंगाम बाकी आहे त्यामुळे येथून प्रवास करणाऱ्या कोणाचाही हकनाक बळी जाऊ नये अथवा अपघातामुळे कोणीही जायबंदी होऊ नये यासाठी या मार्गावर पडलेले भलेमोठे खड्डे बुजवून रस्ता वाहतुकीसाठी योग्य करण्यासाठी संबंधित विभागाने लक्ष देणे आवश्यक आहे, असे सचिन यादव यांनी सांगितले.
