अवैध प्रवाशांकडून वर्षभरात २१ कोटी १७ लाखाचा दंड वसूल
रत्नागिरी : प्रतिनिधी
कोकण रेल्वेच्या मार्गावर फुकट प्रवास करणाऱ्या, लपून प्रवास करणाऱ्या आणि तिकीट नसताना चुकीच्या डब्यातून प्रवास करणाऱ्या प्रवाशांना प्रशासनाने दणका दिला आहे. गत आर्थिक वर्षात तिकीट तपासनीसानी तब्बल २१ कोटी १७ लाख ८० हजार ७४१ रुपयांचा दंड वसूल केला आहे. वर्षभरात सर्वोत्तम कामगिरी करत अवैध प्रवास रोखण्यात यश मिळवलेल्या कोकण रेल्वेच्या तिकीट तपासनीसना सन्मानित करण्यात आले आहे.
कोकण रेल्वेच्या मार्गावर अवैध आणि विनातिकीट प्रवास करणाऱ्या मंडळीविरोधात विशेष मोहीम हाती घेण्यात आली आहे. या अंतर्गत कोकण रेल्वेच्या मार्गावर काम करणाऱ्या तिकीट तपासनिसानी उत्कृष्ट कामगिरी करत ७८११५ कारवाई केल्या. यातूनतब्बल २१ कोटी १७ लाख ८० हजार ७४१ रुपयांचा दंड वसूल करण्यात आला. अशी दंड वसुलीची कामगिरी करणाऱ्या सर्व तिकीट तपासनिसांना कोकण रेल्वेचे अध्यक्ष व व्यवस्थापकीय संचालक संतोष कुमार झा यांच्या हस्ते सन्मानित करण्यात आले.
