रत्नागिरी : प्रतिनिधी
रत्नागिरी एसटी आगरप्रमुखाच्या मनमानीचा फटका प्रवाशांना बसत आहे. त्यातच आता कर्मचाऱ्यांच्या जीवाशी खेळण्याचा एक प्रकार उघड झाला आहे. आगरप्रमुख संदीप पाटील यांना पूर्वकल्पना देऊनहीं आजारपणातून दोन दिवसांपूर्वीच बाहेर आलेल्या चालकाला ग्रामीण ड्युटी देण्यात आली. त्यानंतर ही ड्युटी करून बसस्थानकात आलेल्या चालकाला जिल्हा शासकीय रुग्णालयात ऍडमिट करण्याची वेळ एसटी प्रशासनावर आली. आगारप्रमुखाच्या कर्मचाऱ्यांना जाणीवपूर्वक त्रास देण्याच्या प्रतापामुळे प्रवाशांचा जीव धोक्यात जाऊ शकतो. त्यामुळे प्रवाशांमधून संताप व्यक्त होत आहे. या मनमानी करणाऱ्या आगारप्रमुखावर डीसी बोरसे काय कारवाई करतात, याकडे लक्ष लागले आहे.
बस सुरू असताना आणि प्रवाशी बसमध्ये असताना ठाकुरदेसाई यांना त्रास झाला असता तर? कल्पना न केलेली बरी! ठाकुरदेसाई यांना त्रास देण्याच्या प्रतापामुळे प्रवाशांचा जीव धोक्यात घालणारी ही घटना आहे. आगारप्रमुख संदीप पाटील याच्यावर कारवाई करावी, अशी मागणी प्रवाशी करणार असल्याचे समजते.
दिनांक २१ मे रोजी आजारपणातून बाहेर पडलेल्या एसटी चालक ठाकुरदेसाई यांनी रूजू होताना मला थोडा त्रास होत आहे, तेव्हा मला शहरी वाहतूक सेवा द्यावी, अशी मागणी केली होती. त्यानुसार त्यांना शहरी वाहतूक देण्यात आली. दरम्यानच्या काळात ठाकुरदेसाई यांच्याविरोधात एका माजी एसटी कर्मचाऱ्याने लेखी तक्रार केली. त्या माजी कर्मचाऱ्याने स्वतः शिवीगाळ करून उलट तक्रार दिली होती. यावर ठाकुरदेसाई यांनी त्या माजी कर्मचाऱ्याविरोधात पोलिसात तक्रार दिली आहे. मात्र या दोन्ही गोष्टींचा विचार न करता ठाकुरदेसाई यांना शहरी वाहतुकीतून ग्रामीण वाहतुकीसाठी बदली करण्यात आले. सेवाज्येष्ठता, आजारपण असताना शहरी वाहतूक करणे शक्य होते. मात्र सलग लांब मार्गाची वाहतूक करणे ठाकुरदेसाई यांना अडचणीचे जात होते. याबद्दल त्यांनी आगारप्रमुख पाटील यांना पूर्वकल्पना दिली होती. मात्र तरीही जाणीवपूर्वक त्रास देण्याच्या हेतूने ठाकुरदेसाई यांना ग्रामीण वाहतूक देण्यात आली. काल ड्युटी करून आल्यावर बस स्थानकात गाडी आली आणि ठाकुरदेसाई यांना पुन्हा त्रास सुरू झाला. त्यांना गाडीतून खाली उतरताही येत नव्हते. शेवटी कर्मचाऱ्यांनी एकत्र येऊन ठाकुरदेसाई यांना रत्नागिरी जिल्हा शासकीय रुग्णालयात दाखल केले. आगार प्रमुखाच्या मनमानीचा फटका कर्मचाऱ्यांना बसत आहेच, परंतु हा प्रवाशांच्या जीवाशी खेळण्याचा प्रकार आहे. त्यामुळे त्यामुळे प्रवाशांमधून संताप व्यक्त होत आहे. या मनमानी करणाऱ्या आगारप्रमुखावर डीसी बोरसे काय कारवाई करतात, याकडे लक्ष लागले आहे.
