रत्नागिरी : प्रतिनिधी
लाचखोर लोकसेवक रत्नागिरी जिल्हा पुरवठा अधिकारी प्रदीप प्रीतम केदार याला ११ हजाराची लाच घेताना लाचलुचपत प्रतिबंधक विभाग रत्नागिरीच्या पथकाने रंगेहाथ पकडले. त्याच्यावर भ्रष्टाचार प्रतिबंधक अधिनियम १९८८ (सुधारित२०१८) चे कलम ७ प्रमाणे गुन्हा दाखल करण्याची पुढील कार्यवाही सुरू आहे.
लाचखोर लोकसेवक रत्नागिरी जिल्हा पुरवठा अधिकारी प्रदीप प्रीतम केदार याने तक्रारदार यांचे अखत्यारीतील गोदामाची तपासणी करून धान्य साठ्यामध्ये तफावत असल्याचे सांगून त्याबाबत वरिष्ठ कार्यालयास नकारात्मक अहवाल पाठवण्याची भीती तक्रारदाराला घातली. असा अहवाल न पाठविण्यासाठी तक्रारदार यांच्याकडे पंधरा हजार रुपयांचे लाचेची मागणी केली. त्यानुसार लोकसेवक केदार यांनी दिनांक २८ मार्च २०२५ रोजी तडजोडीअंती ११ हजार रुपये लाचेची मागणी करून स्वीकारण्याचे मान्य केले. ती लाच रक्कम जिल्हाधिकारी कार्यालय रत्नागिरी येथे तक्रारदार यांच्याकडून स्वीकारली. लोकसेवक केदार याने लाचेची रक्कम स्वीकारताना त्याला रंगेहाथ पकडण्यात आले असून भ्रष्टाचार प्रतिबंधक अधिनियम १९८८(सुधारित२०१८) चे कलम ७ प्रमाणे गुन्हा दाखल करण्याची पुढील कार्यवाही सुरू आहे. यातील तक्रारदार हे पुरवठा निरीक्षक संगमेश्वर म्हणून या पदावर कार्यरत आहेत. तक्रार यांच्या अखत्यारित असणारे संगमेश्वर येथील धान्य गोदाम यास माननीय जिल्हाधिकारी रत्नागिरी, तहसीलदार संगमेश्वर यांनी दिनांक २२ मार्च २०२५ रोजी भेट दिली होती त्यावेळी तक्रारदार हे गैरहजर होते, त्याची भीती लाचखोराने तक्रारदाराला घातली होती.
ही कारवाई पोलीस निरीक्षक मच्छिंद्र जाधव, सहाय्यक फौजदार चांदणे, पो. ह. दीपक आंबेकर, पो.ह. संजय वाघाटे, पो.ह. विशाल नलावडे, पो.अं. राजेश गावकर या पथकाने पोलिस अधीक्षक, एसीबी, ठाणे परिक्षेत्र शिवराज पाटील, अप्पर पोलीस अधीक्षक सुहास शिंदे, अप्पर पोलीस अधीक्षक संजय गोविलकर, पोलिस उपअधीक्षक, एसीबी, रत्नागिरी अविनाश पाटील यांच्या मार्गदर्शनात केली.
