राजापूर : प्रतिनिधी
राजापूर शहरातील शिवस्मृती मंडळाच्यावतीने रविवारी सकाळी शिवजयंतीच्या निमित्ताने भव्य मोटारसायकल रॅलीचे आयोजन करण्यात आले होते. या वाहन फेरीमध्ये शहरातील सुमारे पाचशे मोटारसायकल स्वारांनी सहभाग घेतल्याने शहरातील वातावरण भगवेमय झाले होते.सोमवारी तिथीनुसार शिवजयंती साजरी केली जाणार आहे.
राजापूर शहरातील शिवस्मृती मंडळ राजापूर यांच्यावतीने दरवर्षी शहरातील शिवस्मारकावर तिथीनुसार शिवजयंती साजरी केली जाते. यावर्षीदेखील शिवजयंतीच्या निमित्ताने शिवस्मृती मंडळ यांच्या वतीने १६ मार्च व १७ मार्च असे दोन दिवस विविध कार्यक्रमांचे आयोजन करण्यात आले आहे. सोमवारी साजऱ्या होणाऱ्या तिथीनुसार शिवजयंतीच्या निमित्ताने रविवारी सकाळी वाहन फेरीचे आयोजन करण्यात आले होते. शहरातील एस टी डेपो येथे प्रथम धर्मध्वजाचे पुजन करण्यात येवुन ही वाहन फेरी कोदवली गुरववाडी, जकातनाका, जवाहर चौकातुन बाजारपेठ मार्गे चिंचबांध, वरचीपेठ येथील राजीव गांधी क्रिडांगण पुन्हा मागे वळुन बंदरधक्का, वैशंपायन पूल, गुजराळी बागकाजी, दिवटेवाडी, साखळकरवाडी ते जवाहर चौकातील शिवस्मारक काढण्यात आली.
या वाहनफेरीत शहरातील महिलावर्गासह सुमारे पाचशे वाहनचालकानी सहभाग घेतला होता. प्रत्येकाने आपल्या मोटारसायकलला भगवा ध्वज लावला होता. तर प्रत्येकाने भगवा फेटा बांधल्याने राजापूर शहरातील वातावरण भगवेमय झाले होते. शिवस्मृती मंडळाच्या वतीने शिवजयंतीच्या निमित्ताने रविवार १६ मार्च व सोमवार १७ मार्च असे दोन दिवस विविध कार्यक्रमांचे आयोजन करण्यात आले आहे.
