राजापूर : प्रतिनिधी
तालुक्यातील कुवेशी येथील एका आंबा कलमाच्या बागेला लावलेल्या तारेच्या फासकित ब्लॅक पॅंथर अडकल्याची घटना बुधवारी घडली. राजापूर वनविभागाने या ब्लॅक पॅंथरची फासकीतून मुक्तता करत त्याला नैसर्गिक अधिवासात सोडले.
दि. २६ जून रोजी मौजे- कुवेशी येथे हर्षद हरेश्वर मांजरेकर यांचे आंबा कलम बागेच्या गडग्याला लावलेल्या तारेच्या फासकित वन्यप्राणी ब्लॅक पँथर अडकल्याची माहिती पद्मनाथ उर्फ पिंट्या कोठारकार यांनी परिमंडळ वन अधिकारी राजापूर यांना दूरध्वनी वरून दिली. त्यानंतर ही घटना परिक्षेत्र वन अधिकारी रत्नागिरी यांना कळवून, त्यांचे समवेत वनपाल राजापूर, वनरक्षक राजापूर व रेस्क्यू टीमसह घटनास्थळी जाऊन ब्लॅक पँथरला फासकी मुक्त करण्यात यश आले. पँथरला पिंजऱ्यात घेऊन पशू वैद्यकीय अधिकारी राजापूर प्रभास किनरे व पशुधन विकास अधिकारी श्रीम. प्राजक्ता बारगे यांचे कडून बिबट्याची तपासणी करुन घेतली आणि त्यानंतर त्याला नैसर्गिक अधिवासात सोडले आहे. ब्लॅक पँथर हा नर जातीचा असून त्याचे वय सुमारे ५ ते ६ वर्ष असल्याचे वनविभागाने स्पष्ट केले आहे.
