लोकसभा निवडणुक निकालानंतर रडगाणे सुरू, सोशल मीडियावर पोस्ट
नवी दिल्ली : प्रतिनिधी
भारतात ईव्हीएम मशीन हे ब्लॅक बॉक्ससारखे असून त्याच्या तपासणीची परवानगी नाही, असे सांगत काँग्रेसचे नेते राहुल गांधी यांनी ईव्हीएम मशिनवर पुन्हा एकदा खापर फोडून रडगाणे सुरू केले आहे. मुंबईतील शिवसेनेचे नेते रवींद्र वायकर यांच्या मेव्हण्याने मतमोजणी केंद्रात मोबाईलचा वापर केला होता. यासंदर्भातील बातमीचे कात्रण राहुल गांधी यांनी आपल्या सोशल मीडीया पोस्टमध्ये जोडले आहे.
अमेरिकेच्या निवडणुकीत ईव्हीएमचा वापर केला जाऊ नये, असा सल्ला टेस्ला कंपनीचे सर्वेसर्वा एलन मस्क यांनी यांनी दिला आहे. इलेक्ट्रॉनिक वोटिंग मशीन रद्दबातल करण्याची गरज आहे. हे मशीन एकतर मानवाद्वारे अथवा कृत्रिम बुध्दीमत्तेद्वारे हॅक केले जाण्याची शक्यता आहे. अर्थात हा धोका कमी असला तरी त्याची शक्यता जास्त असल्याचे मस्क यांनी सोशल मीडीया संदेशात म्हटले होते. हा संदेश रि-पोस्ट राहुल गांधी यांनी केला आहे.
उत्तर पश्चिम मुंबई मतदारसंघात शिवसेनेचे उमेदवार रवींद्र वायकर यांनी 48 मतांनी ठाकरे गटाचे उमेदवार अमोल कीर्तीकर यांचा पराभव केला होता. मतमोजणी दरम्यान गैरव्यवहार झाला असल्याचा आरोप कीर्तीकर यांनी केला होता. मतमोजणीच्या दिवशी वायकर यांचा मेव्हणा मंगेश पंडीलकर याने मतमोजणी केंद्रात मोबाईलचा वापर केल्याचा आरोप आहे. याप्रकरणी गुन्हाही दाखल झाला आहे. यासंदर्भात एका वृत्तपत्रात आलेल्या बातमीचे कात्रण राहुल गांधी यांनी आपल्या पोस्टमध्ये जोडले आहे. त्यावर भारतात ईव्हीएम मशीन हे ब्लॅक बॉक्ससारखे असून त्याच्या तपासणीची परवानगी नाही, असा संदेश दिला आहे.
