रत्नागिरी : प्रतिनिधी
कोकणात रायगड लोकसभा निवडणुकीत महाविकास आघाडीचे उमेदवार अनंत गीते यांच्या प्रचारासाठी आयोजित गुहागर येथील भरसभेतच अनंत गीते आणि आमदार भास्कर जाधव यांच्यातील वाद चव्हाट्यावर आला आहे. यानंतर राजकीय वर्तुळात मोठी खळबळ उडाली आहे. मागची लोकसभा निवडणूक मी या मतदार संघातून लढलो, पण ती तटकरे यांच्या विरोधात नाही, तर मी गुहागर येथे भास्कर जाधव यांच्या विरोधात लढलो, असं वक्तव्य अनंत गीते यांनी केलं. अनंत गितेंच्या या वक्तव्यानंतर भास्कर जाधव यांनी हातात माईक घेत व्यासपीठावरूनच गीते यांना रोखलं.
गितेंना थांबवत ते म्हणाले, सॉरी सॉरी गीते साहेब मला असं वाटतं की तुम्ही थोडं हे बोलणं आता टाळलं पाहिजे. त्याचं कारण असं तुमचे हे जे खाली चेले चापटे आहेत ते वेगळ्या अर्थाने प्रचार करत आहेत. आत्तासुद्धा दोन व्यक्तींनी सांगितलं की भास्कर जाधव गीतेंच्या विरोधात आहेत, पण मी कोण विरोधात, मी तेव्हा ज्या पक्षाचा होतो त्या पक्षाचं मी काम करत होतो. तेव्हा आता हे जमलं तर बदला. त्याची परिणीती अशी होते की भास्कर जाधव गीते यांच्याविरोधात आहे असा मेसेज जात आहे, अशा शब्दात ठाकरे गटाचे नेते आमदार भास्कर जाधव यांनी गीते यांना व्यासपीठावरुनच सुनावलं आहे.
मी पक्षात राहून कधीही गद्दारी केलेली नाही, जसा अनुभव मी चिपळूणमध्ये निष्ठावतांचा घेतला आहे. म्हणजे पैसे प्रभाकर शिंदेंचे आणि मत रमेश कदम यांना ही निष्ठा माझ्याकडे नाही, अशा शब्दतच गुहागर तालुक्यात आयोजित प्रचार सभेत भास्कर जाधव यांनी सुनावलं आहे.त्यानंतर अनंत गीते म्हणाले, की तुम्ही माझं पुढचं वाक्य ऐकलं नाही. यालाही प्रत्युत्तर देत भास्कर जाधव म्हणाले, की मी तुमची सगळी भाषा ऐकली आहेत. त्यानंतर गीते पुढे म्हणाले, या मतदारसंघात तटकरे यांचं काही आहे का नाही? त्यामुळे आता भास्कर जाधव आणि अनंत गीते एक आहेत. यानंतर भास्कर जाधव यांनी वेळ सावरुन नेत गीते यांच्या या विधानानंतर आता टाळ्या वाजवा असं सांगितलं आणि गीते यांचं पुढचं भाषण सुरू झालं.
