लांजा : प्रतिनिधी
लांजा शहराच्या सर्वांगीण विकासासाठी आणि स्थानिक नागरिकांच्या प्रलंबित मागण्या पूर्ण करण्यासाठी आमदार किरण भैय्या सामंत यांच्या प्रयत्नांना मोठे यश आले आहे. लांजा नगरपंचायत क्षेत्रातील विविध विकासकामांसाठी शासनाकडून तब्बल २० कोटी रुपयांचा निधी मंजूर करण्यात आला आहे. या मंजुरीमुळे लांजा परिसरात उत्साहाचे वातावरण असून नागरिकांनी व कार्यकर्त्यांनी आमदारांचे जाहीर आभार मानले आहेत.
शहरातील वाढती लोकसंख्या आणि पायाभूत सुविधांची गरज लक्षात घेऊन आमदार किरण सामंत यांनी विविध विकासकामांचे प्रस्ताव शासनाकडे सादर केले होते. मुख्यमंत्री आणि नगरविकास मंत्र्यांकडे सातत्याने केलेल्या प्रभावी पाठपुराव्यामुळे अखेर या निधीला मंजुरी मिळाली आहे.
- नवीन प्रशासकीय इमारत : लांजा नगरपंचायतीच्या नवीन प्रशासकीय इमारतीच्या बांधकामासाठी ५ कोटी मंजूर करण्यात आले आहेत.
- उद्यान व जलस्रोत विकास : शहरातील नागरिकांसाठी उद्यान आणि जलस्रोत विकसित करण्यासाठी ६ कोटी खर्च केले जातील.
- स्मशानभूमी व कब्रिस्तान विकास : नागरी सुविधांचा भाग म्हणून स्मशानभूमी आणि कब्रिस्तानच्या विकासासाठी १.५ कोटी मंजूर झाले आहेत.
- शाळा, अंगणवाडी व समाजमंदिर : सामाजिक व शैक्षणिक विकासाला गती देण्यासाठी शाळा, अंगणवाडी आणि समाजमंदिर बांधकामासाठी ७.५ कोटी निधी देण्यात आला आहे.
या निधीमुळे लांजा शहराच्या विकासाला नवी दिशा मिळणार असून, लवकरच या सर्व कामांच्या प्रत्यक्ष अंमलबजावणीला सुरुवात होणार आहे.
