रत्नागिरी : प्रतिनिधी
येथील स्थानिक गुन्हे अन्वेषण शाखेच्या पथकाने रत्नागिरी एमआयडीसी परिसरात धडक कारवाई करत लुप्तप्राय सागरी प्रजातीच्या माशाच्या उलटीला (Ambergris) विनापरवाना विक्रीसाठी आणणाऱ्या इसमाला अटक केली. आरोपीकडून तब्बल २. ५ किलो अंबरग्रीस जप्त करण्यात आले असून त्याची अंदाजे बाजारमूल्य २.५० कोटी रुपये एवढी असल्याची माहिती पोलिसांनी दिली.दिनांक १ ऑगस्ट रोजी, एक इसम एमआयडीसी रत्नागिरी येथे अंबरग्रीस विक्रीसाठी आणणार असल्याची गोपनीय माहिती स्थानिक गुन्हे शाखेला मिळाली होती. यानुसार पोलिस निरीक्षक नितीन ढेरे यांच्या मार्गदर्शनाखाली पथक तयार करून सापळा रचण्यात आला.
रात्री १०. ४५ वा. सुमारास एमआयडीसी परिसरात छापा टाकण्यात आला असता, आरोपी एजाज अहमद युसूफ मिरकर (वय ४१, रा. मिरकरवाडा, रत्नागिरी) हा २. ५ किलो अंबरग्रीस विनापरवाना विक्रीसाठी बाळगलेला आढळून आला. त्याच्याजवळून २.५ किलो अंबरग्रीस (किंमत अंदाजे ₹ २.५० कोटी) आणि ₹५०००० रुपये किंमतीची मोटरसायकल असा मुद्देमाल पोलिसांनी जप्त केला.या प्रकरणी रत्नागिरी ग्रामीण पोलीस ठाण्यात गु.र.नं. १५२/२०२५ प्रमाणे वन्यजीव (संरक्षण) अधिनियम १९७२ चे कलम ३९, ४२, ४३, ४४, ४८, ५१, ५७ अन्वये गुन्हा दाखल करण्यात आला आहे.
ही कारवाई पोलीस अधीक्षक श्री. नितीन दत्तात्रय बगाटे, अपर पोलीस अधीक्षक श्री. व्ही.व्ही. महामुनी यांच्या मार्गदर्शनाखाली पोलिस निरीक्षक नितीन ढेरे व त्यांचे पथक — पोउनि संदीप ओगले, हेका विजय आंबेकर, हेका दिपराज पाटील, हेका विवेक रसाळ, हेका गणेश सावंत, चालक पो.कॉ. अतुल कांबळे यांनी संयुक्तपणे केली. या प्रकरणाचा अधिक तपास सुरू आहे.
