रत्नागिरी : प्रतिनिधी
रत्नागिरी शहरात डेंग्यूचे रूग्ण दिवसेंदिवस वाढत आहेत. त्याचे कारण म्हणजे शहरात विविध ठिकाणी साचलेले पाणी! मुख्यतः अनेक इमारतीमध्ये सांडपाण्याचा निचरा होण्याची व्यवस्था कोलमडून गेली असल्याने मच्छरांचे साम्राज्य निर्माण झाले असून त्याची परिणीती डेंग्यूसारख्या साथीने घेतली असून यावर लवकरात लवकर प्रभावी उपाय योजना करावी अन्यथा आम्ही मनसे पद्धतीने यात लक्ष घालू असे आज रत्नागिरी नगरपरिषदेचे मुख्याधिकारी तुषार बाबर यांना मनसेने ठणकावून सांगितले.
या प्रश्नाकडे बघण्याचा नगरपरिषदेच्या अधिकाऱ्यांचा दृष्टिकोन उदासीन व बेपर्वाई दिसत असल्याने याचा जाब मुख्याधिकाऱ्यांना विचारण्यात आला. याप्रसंगी मनसे तालुकाध्यक्ष रूपेश जाधव, तालुका सचिव ऍड. अभिलाष पिलणकर, विभाग अध्यक्ष अखिल शाहू, जयेश फणसेकर , सोम पिलणकर आदी मनसे पदाधिकारी उपस्थित होते.
शहरात अनेक समस्या असताना त्यावर कोणताही पक्ष अद्याप जाब विचारत नाही. याकडे पाहता मनसेने जाब विचारण्यास सुरुवात केली आहे, ही चांगली गोष्ट आहे. शहराला कोणताच पक्ष वाली नसल्याचे अनेक नागरिक सोशल मीडियावर व्यक्त होत असताना मनसे हा नवीन पर्याय शहरवासीयांना दिसेल यात शंकाच नाही. अनेक विषयावर यापुढे मनसे आवाज उठवणार का हे पाहणे औत्सुक्याचे असेल.
