राजापूर : प्रतिनिधी
शहरातील सुरू असलेली, मंजूर झालेली तसेच प्रस्तावित विकासकामांचा आढावा घेण्यासाठी आमदार किरण सामंत यांनी गुरुवारी राजापूर शासकीय विश्रामगृहात नगराध्यक्ष, नगरसेवक आणि नगर परिषद प्रशासनाची विशेष बैठक घेतली. शहराच्या सर्वांगीण विकासासाठी आवश्यक निधी कमी पडू देणार नसून प्रस्तावित विकासकामे लवकरात लवकर मार्गी लावण्यासाठी पालकमंत्री उदय सामंत यांच्याकडे पाठपुरावा करण्यात येईल, अशी ग्वाही त्यांनी यावेळी दिली.
बैठकीत शासनाच्या विविध योजनांतर्गत शहरात सुरू असलेल्या विकासकामांचा सविस्तर आढावा घेण्यात आला. कामांचा दर्जा कायम राखत ती निर्धारित वेळेत पूर्ण करण्याच्या सूचना आ. सामंत यांनी संबंधित अधिकाऱ्यांना दिल्या. तसेच शासनस्तरावर मंजूर झालेल्या विविध विकासकामांच्या प्रगतीबाबत माहिती घेत आवश्यक मार्गदर्शन केले.
यावेळी नगर परिषदेच्या विविध प्रस्तावित विकासकामांवरही सविस्तर चर्चा करण्यात आली. यामध्ये नवीन नगर परिषद प्रशासकीय इमारतीसाठी १५ कोटी रुपये, बहुउद्देशीय सभागृहासाठी ३ कोटी रुपये, मच्छी व मटण मार्केट उभारणीसाठी ३ कोटी रुपये, सफाई कर्मचाऱ्यांसाठी निवासस्थान व कंपाऊंड वॉलसाठी १ कोटी रुपये तसेच नगर परिषदेच्या मालकीच्या शाळांची दुरुस्ती, तळी स्वच्छता आणि उद्यानांचे सुशोभीकरण यासाठी ३ कोटी रुपयांच्या प्रस्तावांचा समावेश आहे.
या सर्व विकासकामांसाठी आवश्यक निधी उपलब्ध करून देण्यासाठी पालकमंत्री ना. उदय सामंत यांच्यासमवेत बैठक घेऊन आवश्यक पाठपुरावा करण्यात येईल, असे आश्वासन आ. किरण सामंत यांनी दिले. शहराच्या विकासाला गती देण्यासाठी प्रशासन आणि लोकप्रतिनिधींनी समन्वयाने काम करण्याची गरज असल्याचेही त्यांनी नमूद केले.
बैठकीस नगराध्यक्ष ॲड. हुस्नबानू खलिफे, उपनगराध्यक्ष विनय गुरव, काँग्रेस गटनेते ॲड. जमीर खलिफे, शिवसेना गटनेते ॲड. राहुल तांबे, मुख्याधिकारी अभिजित कुंभार तसेच सर्व नगरसेवक उपस्थित होते. नगरसेवकांनी उपस्थित केलेल्या विविध नागरी समस्यांवर आणि विकासकामांशी संबंधित प्रश्नांवर बैठकीत सकारात्मक चर्चा करण्यात आली.
